മണ്ഡല സന്ദർശനത്തിനിടയിലെ അമിതമായ സുരക്ഷാ സന്നാഹങ്ങളിൽ കടുത്ത അതൃപ്തി പ്രകടിപ്പിച്ച് വയനാട് എം.പി പ്രിയങ്ക ഗാന്ധി. കൂടെയുള്ള സിആർപിഎഫ് ഉദ്യോഗസ്ഥരുടെ എണ്ണക്കൂടുതലാണ് എംപിയെ ചൊടിപ്പിച്ചത്. ഇത്രയധികം സുരക്ഷാ ഉദ്യോഗസ്ഥർ കൂടെയുണ്ടാകുന്നത് തനിക്ക് താൽപര്യമില്ലെന്നും, ഇത്തരം നടപടികൾ ഇനി ആവർത്തിച്ചാൽ മണ്ഡല സന്ദർശന വിവരങ്ങൾ മുൻകൂട്ടി അറിയിക്കില്ലെന്നും എംപി മുന്നറിയിപ്പ് നൽകി.
തനിക്ക് ഇത്രയധികം സുരക്ഷാ ഉദ്യോഗസ്ഥരുടെ ആവശ്യമില്ലെന്നും ഒറ്റയ്ക്ക് വന്നുപോകാൻ അറിയാമെന്നും പ്രിയങ്ക വ്യക്തമാക്കി. വലിയ സുരക്ഷാ വ്യൂഹം കൂടെയുള്ളത് പൊതുജനങ്ങൾക്ക് വലിയ ബുദ്ധിമുട്ടാണ് ഉണ്ടാക്കുന്നത്. മലവെള്ളപ്പാച്ചിലിൽ ജീവൻ നഷ്ടപ്പെട്ട സജിതയുടെ നിലമ്പൂർ മുണ്ടേരിയിലെ വീട് സന്ദർശിക്കുന്നതിനിടയിലാണ് പ്രിയങ്ക ഗാന്ധി സുരക്ഷാ ഉദ്യോഗസ്ഥരോട് അതൃപ്തി പരസ്യമാക്കിയത്.
ദുരന്തത്തിൽ മരിച്ച സജിതയുടെ വീട് പുനർനിർമിക്കാനുള്ള പൂർണ സഹായം നൽകുമെന്നും, പ്രദേശവാസികൾ നേരിടുന്ന രൂക്ഷമായ മൊബൈൽ നെറ്റ്വർക്ക് സിഗ്നൽ പ്രശ്നങ്ങൾക്ക് അടിയന്തര പരിഹാരം കാണുമെന്നും പ്രിയങ്ക ഗാന്ധി ഉറപ്പുനൽകി. കൂടാതെ, തൊഴിലുറപ്പ് പോർട്ടൽ നേരിടുന്ന തടസങ്ങൾ പരിഹരിക്കുന്നതിനും, പ്രദേശത്തെ വന്യജീവി ശല്യത്തിന് ശാശ്വത പരിഹാരം കാണുന്നതിനുമായി വരും ദിവസങ്ങളിൽ പ്രത്യേക യോഗങ്ങൾ വിളിച്ചുചേർക്കുമെന്നും എംപി കൂട്ടിച്ചേർത്തു.
