മുഖ്യമന്ത്രിക്കെതിരെ രൂക്ഷ വിമര്‍ശനവുമായി കെ മുരളീധരന്‍. കേരളത്തില്‍ സാധാരണ കന്നിമാസത്തില്‍ മഴ പെയ്യാറില്ല. എന്നാല്‍ പിണറായി ഭരിക്കുമ്പോള്‍ അങ്ങനെ പലതും ഉണ്ടാകും.അയ്യപ്പന്‍ കൊടുക്കുന്ന ശിക്ഷയാണ് ഇതൊക്കെയെന്നും മുരളീധരന്‍ പരിഹസിച്ചു. ബിജെപി കൗണ്‍സിലറുടെ ആത്മഹത്യയിലും അദ്ദേഹം പ്രതികരിച്ചു. അനില്‍കുമാര്‍ ശുദ്ധമായ മനുഷ്യന്‍ ആയിരുന്നു. എന്ത് കൊണ്ട് ആണ് അനില്‍ ആത്മഹത്യ ചെയ്തത്.
ബിജെപിയുടെ സംസ്ഥാന, ജില്ലാ നേതാക്കള്‍ പറഞ്ഞത് അനുസരിച്ചാണ് ലോണ്‍ കൊടുത്തത്. എന്നാല്‍ പണം എടുത്തവര്‍ തിരിച്ചു നല്‍കിയില്ല. പണം നിക്ഷേപിച്ചവര്‍ വന്നപ്പോള്‍ പണം ഇല്ല. ബിജെപി നേതാക്കള്‍ പണം കൊണ്ട് പോയി താമര വിരിയിച്ചുവെന്നും കെ മുരളീധരന്‍ വിമര്‍ശിച്ചു.വിവരം പറയാന്‍ കൗണ്‍സിലര്‍ രാജീവ് ചന്ദ്രശേഖറിനെ പോയി കണ്ടുകാണും. That is none of my business എന്ന് പറഞ്ഞു കാണും. അതാണ് ആത്മഹത്യയിലേക്ക് എത്തിയത്. അഭിമാനി ആയത് കൊണ്ട് ആണ് ആത്മഹത്യ ചെയ്തതെന്നും കെ മുരളീധരന്‍ ആരോപിച്ചു. തിരുവനന്തപുരം നഗരസഭയില്‍ ഈനാംപേച്ചിയാണ് ഭരിക്കുന്നതെങ്കില്‍ മുഖ്യപ്രതിപക്ഷം മരപ്പട്ടിയായി മാറിയെന്നും അദ്ദേഹം പറഞ്ഞു.
നടക്കാത്ത പൊങ്കാലക്ക് ശുചീകരണം നടത്തിയ ആള്‍ ആണ് തിരുവനന്തപുരം മേയര്‍. സാക്ഷാല്‍ വീരപ്പന്റെ കോട്ടയായി തിരു നഗരസഭ മാറിയെന്നും വീരപ്പന്‍ സ്മാരക അവാര്‍ഡ് മേയര്‍ക്ക് കൊടുക്കണമെന്നും അദ്ദേഹം ആവശ്യപ്പെട്ടു. സില്‍വര്‍ മെഡല്‍ BJPക്കും കൊടുക്കണമെന്നും മുരളീധരന്‍ കൂട്ടിച്ചേര്‍ത്തു.
